東大街美食

東大街美食之多，真的要身處其中才知道。而身為記者的我們，每天食食食在此時，美食也就可以重新分類，我們一眾記者會找尋一個平衡點，包括是否接近公司、質量價是否成正比，那選擇起來，個人最欣賞的是一眾下午茶餐。

魯一居

炒肉拉皮 - 配洋蔥炒肉、花生醬，大冷盤上面由中心至外面，係瑤柱、雲耳、蛋絲、紅蘿蔔絲、青瓜絲，底是粉皮。好像是價值$158 。切工的確好細緻，但食法呢？簡單來說就係混醬一齊食，全部炒埋一碟。味道如何？講真，真係唔錯，估唔到刀工，可以令食物有嶄新的口感，我個人評價真係值得一試。蘿蔔絲酥餅 - 3件 - 咁大個人，無食過咁好蘿蔔味的蘿蔔絲酥餅。看來魯一居包點，是首選推介。小籠飽 - 2籠 - 正宗皮薄餡靚又多湯，記得食過中台的鼎泰豐，也沒有他那麼皮薄。鱔糊 - 1碟 - 這個就是「鱔糊」囉! 無特別~ 沙鍋雲吞雞 - 半份 - 出乎意料的鮮味，原來是捨得用料，湯中加入金華火腿～　茄汁蝦鍋巴 - 1份 - 很欣賞他的鍋巴，鬆化入米心，但又不會脆到似餅干，值得一試，但所配的醬汁，就無乜特別。總括而言：魯一居值得推薦，並且飽點最好食～

地址 : 九龍灣宏照道38號企業廣場5期MegaBox 9樓23號舖

電話 : 2359 0188

山東餃子館

老豆都話呢間舖OK，噚晚搵野食，就走來試下。著名的係水餃同麵本身，咁佢有得擇「水餃+麵」，我要的係蕃茄鮮肉水餃麵$18，一個貪心的心態咁試下，晚飯習慣加碟菜，要左$6涼拌青瓜。青瓜先到，食左涼拌青瓜，講白Ｄ係油鹽水+麻油 +青瓜，價錢同食物成正比囉！

等左差不多十分鐘，先至有到個蕃茄鮮肉水餃麵，五粒蕃茄餃。講真，餃同麵都好食，但最好分開食。餃扣左湯，淡左味；而餃本身有一定份量的蕃茄，但湯沖淡左餃變成唔夠味。麵果然有咬口夠彈性，但問題同一，湯會令白麵更加無味，但伴菜又無味，確實完任係一個全面錯的配搭。不過，一心都會想下次再來，但會分開食囉～佢仲有麻細醬四季豆、豆沙鍋餅、千層餅等。

九龍長沙灣元洲街81c舖(近黃金商場、元洲街桂林街街口）

Tel:2729 2800

峰壽司

銅鑼灣區迴轉壽司，無論點比，都係最鐘意來峰壽司食野。三間峰都去過，裡面又最喜愛SOGO附近呢間，三文魚，新鮮凡立貝幾乎都係必食，有劍魚腩就更加Very Nice~

配搭落去，通常加個味噌湯，而蛋壽司同鵝肝都偶然會食～
稱得上叫做飯堂的地方，一個月起碼都要報到一次！

峰壽司
Mi-Ne Sushi

地址 : 銅鑼灣軒尼詩道523-527號恆和鑽石大廈1樓
電話 : 3421 2211

金城餐廳

一直無發現，本人喜愛的筲箕灣茶餐廳係著名的「老街坊」，個日無意中睇到新假期，再留意下佢門口的廣告，先知道佢有２道馳名菜。一個係價值$48的班腩炒 河，一個係$35的焗豬扒飯。前者普普通通，茶樓都有的水準，反而係後者受個人喜愛。焗飯係正宗炒底夠香夠乾夠口感，豬扒先炸再焗，比一般保持到原汁原味，可惜係配搭的蕃茄汁未夠鮮甜。計正來講，除左口感，性價比都係「焗豬扒飯」值得推介。

金城餐廳
Kam Shing Restaurant

地址 : 筲箕灣筲箕灣東大街123號地舖
電話 : 2513-1936

發現號

晚餐趕時間，又係叫飯盒的時候～
以前我係讚個呢間店，依家係～～　食佢要有心理準備，因為不太穩定。
以上是某一例子，呢個叫肉醬意粉喎～
無蕃茄味、無酸味，好都算，當你另一個做法，但加左薯蓉，粟米；最大件事係無味～
真係，幾恐佈都有～

發現號
地址 : 筲箕灣東大街2號麗東海景豪苑第1期地下3號舖
電話 : 2567 4885

金城餐廳

因為想食茄汁豆，就走來金城。
而且，已經有預感，呢餐係全日最好～

地址 : 筲箕灣筲箕灣東大街123號地舖
電話 : 2513-1936

紅螞蟻

早上必需到尖沙咀，附近又得麥記同大快活，就係咁我持續係呢兩間野食早餐，都食左好耐。但講真，呢兩間野的味道都會另人有厭倦的感覺。於是星期一早上，特 意早二十分鐘去附近搵搵仲有無新野食，結果俾我係橫街見到紅螞蟻的餐牌，其實都係個Ｄ野，但人地就有攪攪新意思。我選擇左H，火腿白菌雞蛋炒腸粉 + 意大利咖啡(即係鮮奶咖啡)。又有人服待，食完都係$20，正晒～

紅螞蟻
Red Ant Restaurant

地址 : 尖沙咀亞士厘道27號地下
電話 : 2368-8198菜式 : 港式

小蔡茶餐廳

呢條係盲鰽，話說我細個都未食過，前日晚上回家想起食新鮮魚，便走去小蔡王。
眼看這條不知名的魚，問下女待應，佢話呢條係鹹水新鮮魚（但當時係死左）叫我試下，
盛惠$40，咁我覺得OK，咪試下囉～
魚質幾滑，但味道較薄，但用古法蒸都係不過不失。我一個人攪掂晒～　正！

小蔡茶餐廳
Siu Choi Restaurant

地址 : 深水步石硤尾街 45 號地下
電話 : 2777-2115

小天使餐廳

大家放心, 還沒有死, 不過, 在香港還有這種吃飯的地方, 真的覺得有如在天堂享受, 今日要記下的餐廳名字正是小天使.

赤柱... 印像中都算是貴價地區. 事實上, 識搵識食還是有意外驚喜. 由於工作在筲箕灣, 轉車入去吃晚飯, 可以說路程並不算遠. 唯此名位置確實較隱蔽, 需稍加注意才會留意到. 兩個人吃了一個晚食, 餐湯:西蘭花忌廉湯,頭盤: 酥皮焗螺; 主菜: 豬肋骨及餐飲: coffee. 另再加一個松茸什菌意大利飯, 散件可用$25加甜品及餐飲.

最美味的是"酥皮焗螺", 連一向不喜愛吃貝殼類的我, 也視此為美食. 咖啡及甜品也有意外驚喜. 店舖幽靜, 美食當前, 待應服待周到, 銀包也不會有負苛, 身心都在享受安逸的吃一餐, 談何容易?! 最終連一向小費不習慣多付的我, 也甘心付出十大元. 是繼峰壽司後另一間值得一去再去的餐廳.

地址: 赤柱赤柱大街126號下層舖位C及D(赤柱郵政局側)
電話: 28139090/28137710
每人約140元~

Le Fauchon

某個星期六晚上，食左一個法國全餐。

附送的小食：細細舊，但好好味

前菜：凍食，蠔２隻、大蜆１隻、凍蝦４隻、螺有大有細好似有５隻（我地係咪食左人全家？）其中蝦較差，其他都好鮮味

熱湯：洋蔥湯，待應好好，仲要幫我地分為兩碗，每碗都有芝士同面包放上面

凍食：青檸雪芭甜品，幫我地清一清口味

主菜：羊膝，好香口，七成熟，有少少血色，但剛好

單點：大蝦意粉

甜品：意大利芝士蛋糕 (Tiramisu)

以上係一個Set Dinner加單點意粉，可以食到我同老友反肚。每人都係＄３００，加上待應服務態度好，偶然豪一豪，真係好開心。

Le Fauchon
地址: 中環蘇豪士丹頓街6號地下
電話: 2526-2136
菜式: 法國菜

靠得住靚粥

晚上因為最近趕工的關係, 順道等到老友放工. 由於兩人的食慾仍低, 去了靠得住食粥才回家. 這裡的粥品確實又要一讚, 叫左個白鱔豬潤粥($45),折骨泥猛粥($22),生菜($10)及一碟炒麵($12). 生菜和炒麵沒什麼特色, 但粥品兩個均極鮮甜, 可惜的是所謂折骨泥猛, 骨還是有的, 並不適合小朋友食用.

靠得住靚粥
地址: 灣仔克街7號地下
電話: 28823268

六國酒店西餐廳

因為要慶祝, 依照往例(不知不覺形成), 我地又食自助餐. 對上一次是貴精不貴多的萬豪, 今次轉移陣地去六國. 先說價錢, 應該係$182(唔知人地記錯定我記錯, 有人寫$184), 包埋加一, 是一個合理的自助餐價.

再來看看如何合理, 有冷盤, 螺, 龍蝦, 長腳蟹, 魚生, 水準一般. 但意料之外的是, 有多款外國沙律很有水準, 材料需不貴, 但處理得好, 將食物特色表現出來, 對愛吃的我絕對是樂事. 唯一問題是冷盤經雪藏凍了一點點, 其實沙律不一定要雪凍的, 雙色茄子, 菇類沙律, 木瓜沙津, 有機菜等等等等等等... 正!!! 冷盤我都少有的吃2碟.

熱食方面選擇不多, 但水準還好, 有提供湯麵食, 我看到一個女孩子, 吃了2碗的樣子. 我個人較欣賞燒牛肉, 中西湯各一款, 面包就不太好吃, 連愛吃的老友都受不了.

最精彩的是甜品區, 竟然有部爆谷機, 我地仲食左兩小碟, 又係我話要加... 好好食架!!! 又有格仔餅同薄餅, 老友試左前者, 加haggan dazn雪糕, 實在好味到唔停得口. 最誇的係, 竟然有六款雪糕, 包括芒果, 椰子, 紅豆, 雲哩嗱, 朱古力同士多啤梨. 還有凍熱飲免費無限量供應.

食物款式不算多, 但位置佳, 人不吵也不會搶, 冷盤同甜品都令我心滿意足, 加上整晚氣氛良好, 老友更食了快有八碟的樣子, 呢餐真係好滿足.

ps. 多謝老友請客~~~ yeah~

六國酒店西餐廳
Le Menu Restaurant
地址: 灣仔告士打道72號六國酒店
電話: 2866-2166