準備游泳物品

 單係呢篇我又可以講一堂，所以盡量整理成文，慳時間慳口水。

‧必需品
　(A) 泳衣

　基本上會有特價先買斷碼名牌貨，唔一定係冬天，最重要留意廣告搵特價場，因為成日著，對款式無乜要求，只要唔係白（陽光下會透明），大部份都接受，斷買最大特色係會比正價平一半左右。急買有8、9折就已經叫正常。

　牌子：有平有貴，泳界的名牌係Speedo、Arena，通常300-500；港產有TYR、Goma，一分價錢一分貨，質料耐用度通常成正比，但打算一年一件計，其實應該無大分別。

　女仔有分一件式、兩件式（上身背心）、全身連褲、三點式等。建議買傳統的一件式，最唔建議買縛繩、三點式，去邊到玩，大浪少少或人地勾到，後果可以預料。兩件式都有佢好處，方便易著易除，但有時游游下會飛飛地咁，情況會有少少露肚肚，唔介意就無所謂。全身連褲主要比人怕曬用，我個人覺得除著都煩。

　著上身似內衣，唔可以鬆，記緊落水一定會更鬆。貼身可以比人彈，但唔好緊就叫Good、Fit。
  
　(B) 泳鏡
　泳鏡有好多種，最好選擇有膠邊，而且有得試的店鋪。選擇適合泳鏡方式好簡單，帶左好似吸盤痴住對眼唔跌叫最好，條帶只係附助作用，靠戴帶實會易人水。名牌鏡100-200左右都好夠用，緊記唔好擇吸埋鼻的款式，個款鏡係潛水用。

　近視鏡：依家度數鏡造工幾好，因為可以左右唔同度數。100、200度就唔建議專登買，300以上就視乎個人習慣，但有度數我個人認為會較方便，有聽過學生唔清會驚甚至會暈浪咁，唯一唔方便係上水你仲要戴住鏡，有Ｄ人會覺得有怪怪咁。唔算好建議帶隱形眼鏡，初學者十個有八個都會甩，好難避免大量水入眼，要戴都即棄，跌左唔肉赤。

　(C) 毛巾
 　好多人帶傳統毛巾，建議不妨買吸水巾。即係扭乾就可以再用，一來唔駛帶多條巾，二來扭乾走會較輕便。留意，有兩隻物料，一隻似抺車用，膠質感較重較常見，抹得比較乾身，但有啜的感覺；一隻似布，好似抹唔乾咁，但抹上身會似條布。

‧選購品
　(1) 泳帽 （長頭髮記得帶橡筋）
 　以前自己都唔戴泳帽，因為工作關係，戴過膠質有優點，所以講兩句。膠帽最大優點係「好的泳帽」透氣度較高，戴得好，頭唔會濕趕時間就可以唔洗唔吹。另外，泳池水有很多化學物質，比較傷頭髮，泳帽就可以發揮優點，保持頭髮柔順兼唔散開。

　(2) 拖鞋
  　著重泳池乾淨，著出街的鞋我係唔會著入泳池，有得洗都咁話。若果乖會帶多對，記得買全膠質的拖，無咁好著，但全膠會輕兼易乾，會家方便處理。

　(3) 防水袋
  　有各種Size，放得落會濕的雜物，一般10L左右都好夠。我會放潛水衫，咁就買左25L，其實無咁方便。留意，防水袋部份有得放氣，呢種類型更好用， 但會更貴。

　(4) 旅行裝洗頭水 / 洗身液就最方便。


　(5)保暖防曬衫後補。

認識游泳‧泳池必知

好多人驚水，源於水中的浮力
因身體不隱，從而挑起不安
一個減低心力壓力的因素
在於認識水的特色
（可參考：http://kawing-fung.blogspot.hk/2013/07/blog-post_15.html ）

瞭解心理因素後
不妨學習面對

泳池屬於一個特殊環境
舉個例，就像馬路，很多人認為馬路不危險
但職業駕駛者或資深駕駛者都知道
在馬路上有不當行為，隨時可以致命

水，也一樣
危險程度唔會少過馬路
俗語說欺山莫欺水
絕對係真，每年都有人遇溺
但唔會每年都有人因登山而喪命

但當你知規則和自然規律後
至少，你可以選擇避免大部份的危險
更甚著，可以找到安全感及樂趣

============================
面對方法
============================
1. 觀察再觀察
　邊個位有救生員
    差不多身高的人，行落水的動作，佢地係會係池邊停留，定會行住周圍走
    邊個池人多，人多的池的人做緊乜

2. 閱讀泳池
　泳池，其實有好多標記
　至少要做一件事，沿著泳池行一個圈
　長方形池，一般四個角和中間都會有水深標記
　落水前，若果你有行個圈，你已經知邊到係自己可以「企到」
　
3. 樓梯
　初學游水，建議善用呢個設備

認識游泳‧淺談游泳課程

視乎人天生的水感、學習能力
效果會有所差異
以下步驟和泳式僅供參考

=============================
成人或長者（18歲或以上）
建議學習泳式：蛙式
游泳五階梯

01. 認識泳池 ‧ 控制呼吸 ‧ 扶池浮水 ‧ 扶池浮水站立 

02. 扶池浮水 ‧ 扶池浮水站立 ‧ 持板浮水 ‧ 浮水初學 ‧ 蛙手初學

03. 浮水 ‧ 蛙手 ‧ 蛙腳初學

04. 浮水 ‧ 蛙手 ‧ 蛙腳 ‧ 手腳配合初學

05. 浮水 ‧ 蛙手 ‧ 蛙腳 ‧ 手腳配合 ‧ 手腳呼吸配合

=============================

青年（6歲至18歲）

建議學習泳式：自由式（捷泳）
游泳五楷梯

01. 認識泳池 ‧ 控制呼吸 ‧ 扶池浮水 ‧ 扶池浮水站立 

02. 扶池浮水 ‧ 扶池浮水站立 ‧ 持板浮水 ‧ 浮水初學 ‧踢腳初學

03. 浮水 ‧ 踢腳 ‧ 撥手初學

04. 浮水 ‧ 踢腳 ‧ 撥手 ‧ 手腳配合初學

05. 浮水 ‧ 踢腳 ‧ 撥手 ‧ 手腳配合 ‧ 手腳呼吸配合

=============================

兒童（3歲至6歲）及幼嬰（0歲至3歲）方面處理有很大的不同

兒童與成人或青年學習內容相似
但步驟分拆會較多，有機會再詳談
依經驗而言，他們平均要持續至少一年
每周學習一小時左右，才有機會學識一個泳式

幼嬰方面，會視乎水感
YouTube有多項記錄（當然切勿讓幼嬰自行學習，會無命架！！）
http://www.youtube.com/watch?v=v0mUPr68x2U
http://www.youtube.com/watch?v=kT4Yj9b92J8

游泳心理‧「面對」驚、學唔識

「驚」、「恐懼」、「學唔識」

在教學生涯中，其實我會歸類為一種情緒
而上述三個問題
往往令人走不到去學識游水的終點

這往往其實是源於人類天生的「危機感」
水，其實是看不清
就算是經驗豐富，單憑肉眼量度
都可能因為水的清澈和混濁度
而誤解了水深
當水深有差異的時候
加上浮力和不穩
就會造成「驚」而引發「恐懼」

同樣，在不適當的環境、時間學習
（可參考http://kawing-fung.blogspot.hk/2013/07/blog-post_13.html）
多次的不成功
就會有人誤解做學唔識

當你認識游泳環境和步驟
學游泳就只像學行路
總會有方法

在家學游泳‧第二課 體驗浮水

很多人都話唔會浮 ?

事實上，大部份人都會浮，
即係話，有少部份骨格精奇的人較難浮。

數得出，有健身型和駝背。
健身型由於脂肪比例低，骨及肉密度比水高，
即係滾湯咁，當只有骨和肉會較易於沉底。
（亦都係咁，女生係比男生易浮，因為至少多兩舊肉。）

駝背係另一種特殊的情況，
在水裡面若可以做到流線型，
會比較易浮，所以若有駝背的問題，
就會比較難處理，
但唔代表上述兩類人不能游，
只係佢地會比較需要利用體力變成動力，
將人體向水面上升，
係一種比較花體力的游泳方式。

若果你唔係上述兩類，
恭喜你，更多時候，可能你唔知乜叫浮的技巧。

------------------------------------------
浮，有兩個要點。
一放鬆身體；二盡量保持身體成流線型（姿勢似平躺訓覺。）
在家點練習呢？

------------------------------------------
有浴缸就最好，
同樣，無就拎個盤出來。
手的部份，可以用盤做。

手的部份，只要放超過手掌的水深就可以。
試下將手掌輕鬆打開，
輕放在水面，
然後用力輕輕壓下，沉至水底，
來回五次。

若果可以做到完全不用力，
而手好似水上飄咁，
你應該感受到浮力。

若果仍感受不到，加個浮的物體，如兵乓波。
用一或兩隻手指輕壓個波，放鬆唔用力，係咪感覺到波推番手指上水面。
試下換用手掌，應該可以感受浮力。

換腳的部份，放鬆身體在浴缸，
你會感受到小腿有浮起的感覺，
浴缸若夠大，下身要浮起是可能的。
反轉面，也可以做到。
現在，你已經掌握了浮的感覺。
下一課，要回去泳池體驗。

日後，晚上訓前。
學會放鬆身體的每一部份，
躺在床上，身體每個部份確認自己有無用力？
由腳趾開始數、膝頭、大腿、腰、肩、頸、頭、手臂、手指。

最尾，比多個思考題試玩下。
攤開手，你有無諗過係正面定反面？
握拳頭有無分別呢？
手指伸值放鬆效果又會點？